ವೃತ್ತಾಂತ 


ಮುತ್ತುವ ಮುಂದಾಲೋಚನೆಗಳಲಿ
ಮಾತ್ರ ಮಾಯುವ ದುಮ್ಮಾನಗಳು

ಗೋಗರಿಕೆಯ ಗದ್ದಲಕೆ
ದೀರ್ಘ ನೀರವದ
ಸಮಾಧಾನ

ಅಸ್ಥಿರಗಳ ಅರಿವು ಮೀಟುವ
ಅಪರಾವತಾರ
ಗಳಲಿ ಎದುರಾಗುವ ಸಂಜ್ಞೆ

೨

ಕಲೆವ ಕಾಲಕ್ಕೆ ಕಾಯುವ
ಆಟದಲೆ ಕಟ್ಟಿಕೊಳುವ
ಕ್ಷಣಗಳ ಸಾತತ್ಯ

ಉಕ್ಕುವಕ್ಕರೆಯಲಿ ಬಣ್ಣಿಸಿ
ಕರೆವ ನೋಟಕ್ಕೆ ನಿಲುಕು
ಹೇಳದ್ದೆಲ್ಲಾ ಅರಿವಾಗುವ
ಆ ಲೋಕವೇ ನೆಚ್ಚು

೩

ತಬ್ಬಲಿ ನನ್ನ ಇರುಳು
ನೀರವದಲ್ಲಿ ಶಬ್ದಗಳು
ಸಂತೈಸುವ ತೀವ್ರ ಮುದ್ದು
ಭಾವಗಳ ಚಕಿತ ಚಿತ್ರಣ

ತುಡಿವ ಭಾವವೊಂದು ಜೀವ
ತಣಿಸುತ
ಒಳಗೊಳಗೇ ನಮ್ಮ ಮಣಿಸುವಾಗ
ಮಿನುಗು ಕಾಂತಿಯೊಂದರ ವಿನಿಮಯ

ಒತ್ತು, ಕೊಂಬು, ತಲೆಗಟ್ಟು -
ದೀರ್ಘ .....
ದೊಡ್ಡ ಬಳಗದ ಕವಿತೆ
ನಿನ್ನ ಒಡನಾಟ ನಿರುಮ್ಮಳ

- ರಾಧಿಕಾ ನಡಹಳ್ಳಿ 

(ಹೊಸದಿಗಂತ ೨೦೧೩ರ ದೀಪಾವಳಿ ವಿಶೇಷಾಂಕದಲ್ಲಿ ಪ್ರಕಟ)